إلى الدنمارك

أود قبل كل شيء,أن اهنئكم و نفسي بانتقالنا إلى المرحلة الاعلى في سُلَمِّنا, إلى مرحلة تحولنا إلى( أبقار),
لا تستعجلوا كثيرا,فالمراد بالأبقار هنا ليس السب ولا الذم و لا الشتيمة أو الإساءة - معاذ الله - بل على العكس, هو شيء يُفرِح بعض الناس,
بعض الناس أقول,لأن كوننا أبقار مفيد لأصحاب بعض الشركات ...
كنا نُسمّى(خواريف), فنقول:(تخورفت) في الكافيه الفلاني, أو في المطعم الفلاني, أو (خورفتني) الشركة الفلانية;أي أنه نُصِب علينا و نحن نضحك و نلعب,أو نقول بدي (اخورِف) فلان ;يعني تريد النصب عليه ...
لكننا الآن تخطينا هذه المرحلة في سلم التطور (النَّصبيّ) إن صح التعبير,و انتقلنا من مرحلة الخورفة (أي النصب العشوائي غير المنظم) إلى مرحلة التبقّر (يعني هاد كان انسب فعل للبقر), فالكل بدو يمص حليباتنا - عفوا:مصارينا - إلى درجة غير معقولة,بحط أسعار و غرامات ما أنزل الله بها من سلطان,و ما علينا إلا الطاعة والقول أوامرك مطاعة !
الشركة الفلانية بتغلي الأسعارمنحكي يالله كلها مرة,و المرة الجاي مش حتسلم الجرة!و مندفع !
الشركة نفسها بتشوف انه الوضع ماشي, بترفع اكتر!منهمس بين بعض, و منحكي على الله العوض !ومندفع !
شركات أخرى ترى أن الوضع "شغال" تمام التمام, و بالتالي كلها ترفع, لكن بعضها برفع "بالعقل" و و غيرها "عينك عينك" ...

 بتزكر و انا صغير كان في دعاية لشركة الألبان الدنماركية "لورباك" و كانوا بفرجونا انهم بدللّوا البقر,لدرجة انه كانوا بلعبوا كرة قدم, واذا ما اجت الطابة بالـ(هدف) كانوا بيغيروا مكانه !
وبالتالي انا بدي أحاول جاهدا بكل قواي إني ألاقي تذكرة سفر للدنمارك, علشان اروح و "يحلبوني" لورباك,جكارة بكل "المصّيصة" اللي عنا !
على القليلة هناك بحكولك انت بقرة و بعاملوك كبقرة, لكن هون "بِدَّعُوا" إنك إنسان, و بعاملوك كبقرة !
وعالعافية !