بالمنطق يا أخي...بالمنطق!

حوار  بين "الاصدقاء":

" - هلأ انا بدي أسألك سؤال بعد اذنك؟
- أه تفضل..
-هلأ مش بدكو "تحرروا" فلسطين على قولتكو؟
- اااه يا روح امك, على قولتنا ! 
- طيب سؤالي:لما "تحرروها" وين بدهم اليهود يروحوا؟ "
 تغريب ثقافي بامتياز,طمس للهوية بحرفية,و غسيل دماغ ببرسيل,لانو مع برسيل مفيش مستحيييييييييييييل....
هالأيام كتير بصير هادا الحوار بين ناس لسا مؤمنين انو لازم نحرر فلسطين لانها النا,و بين ناس انغسلت أدمغتهم...


" - انت عم تحكي جد زميل ؟
- اه عم احكي جد شو شايفني بتخوت ؟
- حبيبي انت فلسطيني مو؟
- اه فلسطيني.
- وعم تسأل هيك سؤال ولا؟
- طبعا! يعني بالمنطق يا أخي,استعمل مخك شوي!!!!"
اشي عنجد بضحك:مش شر البلية ما يضحك؟ لما قررنا نستعمل عقولنا,عملنا غلطين...
.صحيح,انتو بتعرفوا شو بحكوا همه(الغرب و شلته) عنا(العرب) ؟ انه احنا منمسك الاشي الصح,و منطبقوا غلط,و اذا غلط منزيد غلطو! بدكو الصراحة؟ هدا الحكي جدا مزبوط للأسف!
المهم نرجع للموضوع,أول غلط انو فكرنا حالنا هيك عم نفكر.. و تاني غلط انو فكرنا انو هيك عم نفكر "منطقيا" !


" - يعني هلأ من كل عقلك بدك تروح تحررها,و تطلع اليهود منها علشان يتشردوا ؟ انت ما عندك رحمة ؟
- والله يا حبيبي,اللي بحتل أرض مش إلو,و بذل الناس اللي فيها,و بستحقرهم,و بدنّس مقدساتهم, و بضرب كل حقوق الانسان بعرض الحيطة,بستاهل كل شي . مش الجزاء من جنس العمل؟
- يا زلمة هدول اليهود فوق ما انعمل فيهم هولوكست و تشردوا و هتلر لعن أبوهم جاي تحكيلي يتشردوا و ابصر شو ؟"
زي ما انتو شايفين,هدا بصير دايما,و هادا النص شبه حرفيا صار مع اكتر من صديق الي...
والباقي عندكو..
و عالعافية!

ملِّق واربح!

التمليق كلمة جدا رائعة,و انا بحيي اللي اخترعها من كل قلبي,لانها كلمة تختزل معاني كتيرة في كلمة واحدة,ملُّقت يعني خلص قرف و ملل و فش اشي تساوي و كابسة معك و واصلة  لراس مناخيرك! وللي ما بعرفها او ما بعرف كيف بتنقرأ,فالـ"ق" بتنقرأ باللهجة الأردنية زي هيك يعني "mallagat" ... للأسف صرنا نستخدم الانجليزي علشان نشرح كيف بتنقرأ الكلمات ! هي وقفت على هاي!


 متل ما انا ملاحظ هالايام,الشعب الاردني كاملا - الا من رحم ربي - عنده حالة تمليق مش طبيعية,في كل الاوقات و كل الاماكن تقريبا..
كله قرفان عيشته و زهقان شغله و دايما معصب,طبعا هادا كله مش من فراغ جاي,هادا جاي بسبب السياسيات الحكومية الرشيدة في التخفيف عن كاهل المواطن قدر الإمكان و رفع مستوى المعيشة و الرفاهية في حياته,فالشب اللي عنده مشاكل اقتصادية و حرمان عاطفي و معوش مصاري يساوي اشي ولا يتجوز اشي طبيعي انو يملق.حتى العيشة نفسها بالنسبة لبعض الناس ترف ما عرفوه لسا...الله يكون بعون الجميع و يفرجها علينا جميعا...


الاشي المش حلو في التمليق انو مش شرط تكون عندك هاي الشروط حتى تملّق,يعني البيئة الها تأثير,فمثلا اذا انت دايما حوالين ناس دايما عندها تمليق,فإشي طبيعي انو هاي الحالة تنتقل إلك و دواليك,برضو شغلة تانية انو التمليق ما بيتورث,يعني لهلأ ما سمعت بجين التمليق,يعني لو عشت بعيد عن أهلك اذا عندهم تمليق اكيد  ما رح "تملق معك" و حتعيش طبيعي..بس ماحدا بعرف بلكي تسير طفرة عنا في الأردن في بعض ناس و يتحول التمليق بقدرة قادر إلى جينات و يصير يتورث!


التمليق في المدارس اشي كتير خطير, و خصوصي اذا كنت طالب توجيهي و بالأخص في الفصل التاني,فهدا اشي جد مقرف,شعور التمليق,حتى لو بدكش,فتلات ارباع الصف مملقة معو,و تلقائيا حتملق معهم كلهم,و تصيبك حالة مقلقة من الاحباط و الصدمة النفسية .. و خصوصي انو الأغلب بكون بايعها على الفصل التاني, والاساتذه التانيين كابسة معهم,و فش حدا طايق التاني و مش مصدق تيخلصوا هالشهرين على خير..فا الله يعين طلاب التوجيهي,و بخلصوا على خير هالسنة و كل سنة ...


تملقوا على خير!
و عالعافية

"إن شينشيتيف"!

في حزّيرة قديمة شوي,بتحكيلك:شو معنا حساس بالانجليزي؟ "سينسيتيف" و مش عارف كيف بدي اكتب ال"v" بالعربي المفروض تكون "ف" عليها 3 نقاط,لكن ما علينا,نكمل:طيب حشاش؟ بتطلع "شينشيتيف"... ممكن تعتبروها دبشة لكن مرقوها هالمرة علشان البناء بكون "متكامل" بالنسبة الي!


هلأ احنا العرب عم نمر بهاي المرحلة من اللامبالاة...و هي مزيج من عدم الاهتمام مع التحشيش,طبعا مش بالضرورة تحشيش يعني مخدرات بعيد عنا جميعا,هو نوع من التحشيش, يعني الضحك بالعامية عنا في الأردن,و تحشيش من كتر ما منحش تلفزيون و "فرندز" و  "90210" اللي طبعا بقصها لإيدي اذا في حدا عنا بحضروا و بعرف قصتو! كلو بس بتطلع عالبنات اللي في....
و طبعا احنا العرب ما منقصر برضو,عنا هيفا و ميريام و نانسي و روبي,وأهم واحد تامر اسم الله عليه حوله و حواليه,مش مقصر,"مطرب الشباب"..هو مطرب اشي تاني بس عيب أحكي بلاش ياخدوني تاعون دائرة المطبوعات!
هادول كلهم زي الإبر تاعون شباب الكوكايين و الماريغوانا,بضلهم يخدروا الواحد عبيل ما يبطل يحس بالمرة... و هادا الاشي المطلوب اصلا, شعوب بتفكرش,و بتحسش اصلا حتى تفكر,فا مش مشكلة,بتشوف كل يوم تفجيرات في العراق,صاروا الناس يموتوا مية مية و احنا تمسحنا,في فلسطين,الناس بتدبحوا و بلتعن أبو سنسفيلهم كل يوم و برضو مش مشكلة,المسجد المرواني في تشققات,منصير نحكي يالله الحمدلله المسجد الأقصى ما صار في اشي,بصير في انهيارات جمب باب من بواب المسجد,منحكي لسا ما وصل المسجد...


 امبارح أو قبل امبارح التاريخ مش مهم,بحكيلك اسرائيل أعلنت ضم الحرم الإبراهيمي الشريف واللي حواليه كآثار يهودية رسميا..
فأنا قررت أشجب و أستنكر و أعترض و بدي أطالب الاتحاد الأوروبي بالضغط على اسرائيل للتراجع عن القرار و بعدين بدي أروح لليونيسكو و اقدم طلب اعتراض و بعدين بدي اروح أطلب عقد قمة عربية طارئة للخروج بخطة تخرجنا من هذا المأزق السلمي مع اسرائيل حتى ما تتلاشى فرص عيش الفلسطينيين مع الاسرائيلين في تناغم بعدين!
اليوم كان هاداموضوع نقاش في برنامج "حياة اف ام" الصباحي,في واحد من المتصلين شكلو ماخد "اوفر دوز" من مسلسل او اشي امبارح..و صار يحكي انو احنا ما لازم نزعل على هيك حركة,و تبريره انو هيك اليهود و الاسرائيلية بفرجونا حالهم على حقيقتهم,علشان هيك احنا مش لازم نزعل....
انا بحكي يروح هادا الاخ يشوف دكتور "فِل" لانه "فُل اوبشنز" ...
و عالعافية!

قضية؟ لأ مش قضية!

"مممم...زهرة؟ لأ لأ!!.....شوكولاته؟ برضو لأ!!!....."شوز" كونفيرس ؟ صعبة شويتين! و بعدين مع هالشغلة !
 خليني أسأل رامي,أكيد حيعرف!....
- ألو رامي..كيفك ؟
- هلا هلا ابوحميد..انا منيح,انت؟
- تمام تمام.. بس يا زلمة مش عارف شو بدي أجيب هدية علشان هبة!
- شو تجيبلها ؟ يا زلمة انت ليش عاملها قضية؟ ولك بوكيه ورد على كيف كيفك و خلصنا!
- يا أخي مش قضية;بس هاي هبة يا زلمة! هبة! قال شو..بوكيه ورد!"
لأ,مش هاي القضية اللي بحكي عنها..القضية اللي بدي أحكي عنها أسمى من هيك بكتير...قضية ما بتيجي على بالنا إلا في المناسبات.
القضية هي فلسطين,قضيتنا من ال48 لحد هلأ,قضيتنا مش علبة شوكولاته و لا شقفة كندرة...قضيتنا قضية بلاد;بلاد إلنا و مش إلنا..إلنا لإنها بلدنا و بلد أجدادنا. و مش إلنا لإنه لقينا قضايا "أهم" منها تشغل تفكيرنا و احساسنا.. مش إلنا لإنو ضيعنا القضية لما صرنا نهتم شو بتعمل هانا مونتانا في حياتها,و لما صرنا نهتم باعترافات كلوديا شيفر إنها كانت خجولة و هي صغيرة - يا روح أمك يا كلوديا!.. و لما صرنا نعرّف الناس من بلادهم بأسماء المغنيين متل ما صار مع أحلام مستغانمي...

غزو ثقافي رهيب و غسيل دماغ أرهب!حولنا من أصحاب للقضية إلى أصحاب للطبقات المخملية لا تهتم إلا بالمسلسلات الحصرية ذات القيم غير الأخلاقية المدبلجة من التركية و التي تُشبِع غرائز داخلية على قنوات عربية مية بالمية!

أي بكفي! و بعدين مع هالشغلة ؟ متى بدنا نصحى و نوعى على حالنا ؟ متى بدنا نصير نفكر ؟ يعني تشي جيفارا أحسن منا اشي ؟
عندو إجر أو إيد أكتر منا ؟ لا والله ما ناقصنا اشي!و هيو العقل موجود ما شاء الله عليه زي طنجرة التيفال,غير قابل للصدأ,لكن قابل لتراكم الغبار عليه... ما نشيل هالغبرة من عليه و نبدا نقرأ بكتبنا ؟ بتاريخنا ؟ نبدا نعرف مين الخاين و مين الشريف,مين العاطل و مين المنيح!
بس ما هو احنا "عرب" ما منقرأ,إن قرأنا ما منفهم,و إن فهمنا ما منعمل اشي!
ما بكفي الذل اللي احنا فيه هلأ ؟ولا بدنا كمان ؟ يمكن صرنا متعطشين للذل,اذا فش ذل ما منعيش ! اذا هيك ليش عايشين ؟
ما نموت أحسن ؟ بس كيف بدنا نقتل حالنا ؟
حرق؟ البنزين أغلى من الإنسان هالأيام...
شنق ؟ الخشب و الخيوط عليهم ضرايب خير الله!
طخ؟ ممنوع امتلاك الأسلحة!
أحسن اشي نموت من الضحك...بتعرفوا على مين ؟ على حالنا....
ما هو كلو ضحك بضحك!
وعالعافية!

جمهور "مش إنساني"!


لكل إنسان فينا شخصية,والمفروض انو تكون شخصية كل إنسان فينا متميزة,وبالتالي بيترك بصمة "مميزة" في اللي بعمله..
احنا العرب للأسف مش استثناء من هادا الحكي,و لازم تنرك بصمتنا الخاصة,كمان شوي بتعرفوا عنها...


"هاربون إلى المدرسة" مشروع نبيل جدا,اتفق فيه مجموعة من الأشخاص على عدم الاكتفاء بالشجب و التنديد باللي بيصير في غزة,و فكروا بقسم دائما مهمش من المجتمع,الأطفال,و انفقوا انه ينظموا حدث بيروح ريعه لمراكز محو الأمية للأطفال في غزة.. و من هون أجت تسمية المشروع, فأطفال غزة بهربوا للمدرسة من واقعهم الصعب,مش زي حضراتنا منهرب من المدرسة للفزلكة!


اليوم الأول للفعاليات كان مع الممثل الممتاز غنام غنام في مسرحيته "عائد إلى حيفا" المستوحاة من رواية بنفس الاسم للخالد غسان كنفاني..
ما رح أحكي عن المسرحية,لانو كان كل شي ممتاز يومها !


منيجي لليوم التاني!
فرقة الحنونة,طارق الجندي,سحر خليفة,"سيكولاس",سام,المربع,و يزن الروسان مع فرقته أوتوستراد..
أسماء كتيرة بالنسبة لـ3 ساعات لكن مش مشكلة,كلو لغزة..
كتار يلي كانوا جايين علشان يشوفوا الحنونة خصوصي,لكن بتتفاجأ انو الحنونة أجت اقل من 15 دقيقة,ولعت الجمهور و طلعت...!يلا سيدي كمان هاي بتمشي ...
بعديها اجا المبدع دائما مع شرق,طارق الجندي.
المستَغرَب أنه طارق قعد يستنى بالجمهور انو يزوق على دمو و يسكت و ما سكت,اضطر انو يمسك المايك و يحكي لو سمحتو هدوء علشان ابدا!و المضحك أكتر انو الناس ما سكتت! لدرجة انو واحد من الحضور صرخ على كمشة بنات انو يسكتوا, و اكيد ما سكتوا لبعدها بشوي!! مزبوط مزبوط. اعذروني شكلهم أكييد عرب!
ببدع طارق مع عوده, و بتيجي سحر خليفة, ممتازة,صوت حلو و كلمات حلوة و عزف حلو مع العود و الكمان ..
الآن بدا الجد! الراب العربي..عالعموم أنا بكره الراب جدا و من أشد معارضيه..لكن الراب "السياسي" اللي بحكي عن أوضاعنا المزرية و خصوصي في فلسطين الو وضع خاص,و كنت متحمس أسمع شو عند اخوانا سيكولاس و سام..
قبل ما يدخل سيكولاس,بدت شباب "الكوول" بالهتاف باسمه,يعني بدنا ندخل في "الموود"!دخل مع اللي بدو يساندوا, منتفاجأ انو شباب الرينة لسا بهتفوا باسمه و شافو صديقه زعل قاموا يهتفوا باسمه و نسيو حالهم ! تا أجا واحد من المنظمين و سكتهم..
مع اني ما فهمت كل الكلام اللي حكا لكن اشي حلو,بعديه أجا العم سام,بكلام حلو و أداء جميل حمّس الجمهور بما فيهم أنا و خلّص..
المربع,فرقة غريبة في الموسيقى يلي بتعزفها,لكن كلام جدا في الصميم و موسيقى حلوة...الصوت ما عجب نسبة من الموجودين و بدا قسم من الجمهور يطلع من الحفلة ..
الآن بدينا بالبصمة ,يلي أنا مستغربو انو في ناس جايين على حفل لغزة علشان يحضروا يزن الروسان!!! و بدت البصمة الخالصة!صاروا بعض الشباب يهتفوا"يزن الروسان...يزن الروسان...يزن الروسان" بشكل مقرف و مثير للاشمئزاز ! الشباب يلي حابين المربع ما قصروا برضو! فصاروا يهتفوا "المربع...المربع"... انا مش عارف شكلها قلبت حرب زي بين الجزيرة و العربية!
وقتها سمعت بنت حكت " لأ حررنا فلسطين فيكو! بتتقاتلوا يزن ولا المربع؟!؟!؟!"
يعني متى رح نفهم أنو لكل مقام مقال ؟ و انو هادا اشي لغزة! نستحي على حالنا شوي بس!
بصراحة انا طلعت من المسرح قبل ما يبدا يزن الروسان,لاني ما حبيت أشوف المسخرة اللي رح تصير وقتها!
و متل ما حكا سيكولاس في مقطع من المقاطع يلي فهمتها " هادا اشي مش انساني" ..
متى بدنا نتعلم الأدب و نصير آدميين ؟جد اشي مش انساني!!!





عن حضرتي

أَنا حوارُ الحالمين ، عَزَفْتُ عن جَسَدي وعن نفسي لأُكْمِلَ رحلتي الأولى إلى المعنى ، فأَحْرَقَني وغاب

اللي بلحقوني

منعنعات

Qwaider Planet
Follow me on Watwet
Jordan Blogs

مدونات أتابعها

الازمة عندي