وينك وزارة الاوقاف ؟

حتى مع كل الحلول اللي بتتخذها وزارة الأوقاف,أو ما بتتخذها فالأمر سيان,فخطباء جمعتنا لسا عايشين في "الأزمنة الغابرة" , و يا ريتهم بعرفوا يحكوا زي ما بحكو أهالي هاي الازمنة !
 اليوم,و بعد ما "انسم بدني عالمزبوط" من شيخنا,خطر ببالي اقتراح اتوقع انه رح يفيد كتير في اصلاح الأوضاع الخطيبية المستعصية,اقتراحي كالآتي:
في جمعة من جمعات الصيف الحارقة,منجيب اي واحد من الشارع,مش مخلص توجيهي,بشرط إنه يكون عنده اللي ممكن نسميه أبجديات اسلامية,ومنتأكد من انه صديقنا ما عندو اي صفة من صفات الخطباء بالغلط,و بكون احسن لو يكون عنده اي نوع من انواع التدفق الزائد (كهربائيّ,مغناطيسيّ,غبائيّ,...) في جسمه حتى يصرّخ صرخة "بتصرع صرع" بين كل شوي و شوي في الخطبة العصماء تاعته ...
بعدين مناخد الاخوان الخطباء و صديقنا المستشيخ بباص جت لمسجد ساحته كبيرة,و منخلي كل الخطباء بره في الساحة و بس صديقنا يخطب جوه. تحت المروحة مبورد يا محلاه..
صديقنا رح يلقي خبطة ارتجالية تماما, ولا كلمة محضرة مسبقا,صديقنا رح يحكي شوي عن غزوة بدر,و شوي عن غزوة أحد,وعن أهمية الصلاة في حياة الانسان المسلم,و بعدين بحكي شوي عن فسق الغرب وفجوره ,و بده يحاول بتفلسف و يبحث في اسباب انتصار الغرب علينا,واعذروه لجهله هو بعرفش المقولة اللي بتحكي (إن الله لينصر الأمة الكافرة االعادلة على الامة المسلمة الظالمة) ...
و من منطلق انه صديقنا "مكيّف على حاله" فما بظن انه يخلص كل هدا الحكي بأقل من ساعة,و بعدين الله أعلم بينهيها بدعاء او من دون دعاء ...
وبس نخلص,منروح و منسأل شيوخنا عن رأيهم في الخطبة اليوم,وبالجو والمواضيع و الوقت,اذا تشكونوا و تذمروا معناتو نجحت خطتنا,بس اذا حكو كل شي تمام,
فلازم نحكي,وينك وزارة الأوقاف ؟ أكلناها عالمزبوط !

7 التعليقات:

Haitham هيثم Al-Sheeshany الشيشاني 17.4.10  

و الله كلامك مزبوط، مع الأسف.
خطب إشي بجنذن! بالمعنى السلبي لكلمة "بجنّن" .
الكلام عن تأهيل الخطباء و تدريبهم و .. و .. كله ----> كلااام!

شكرا ً لك.

Dr.Mohammed 17.4.10  

و الله يا صديقي ما في حدا بنسم بدنو اكثر مني من خطباء الجمع، للاسف صارت خطبة الجمعه تحصيل حاصل ، و روتين ، للاسف المواضيع نفسها هي هي ، حتى الاحاديث اللي سمعناها الخطبة الماضية بتنعاد نفسها مع انو ما الها دخل بالموضوع ، خطيب المسجد اللي جنبنا ببلش بموضوع الجهاد و بعدين بنسى الموضوع الاساسي و بنتهي بموضوع المسح على الخفيين ، فانت بتطلع مش فاهم شو الموضوع و مش مجمع كلمتين على بعض.

انا اللي بطلبو من الخطباء انو يكون موضوع خطبة الجمعه موضوع بهمنا و بفيدنا ، و الله لو يخطب عن موضوع كيفية الصلاة و احكامها احسن من انو يضلهم يعيدو عن موضوع غزة احد الف مرة زي كانو درس تاريخ ، ما تفهموني غلط انا مش مع التعدي على علماء امتنا و ما قصدي اصغر من عظم غزة احد و الدروس المستفادده بس الخطيب اللي عنا هون بخليك تنام غصبن عنك

Sh3rawi 17.4.10  

اخ هيثم,
وصلنا مرحلة من التخلف و التفاهة و إعطال العقل و عدم التفكير بشكل لا يصدق!

دكتور محمد,
كلامك مزبوط,بس همه فيهم اشي الخطباء,يعني يا بفكروش,يا اخي مش عارف مالهم !
السنة الماضية رحت عمرة,و صلينا الجمعة في مكة,بتعرف عن شو كانت الخطبة ؟
فضل آية الكرسي,10 دقائق و كان مخلص الخطبة و بدا صلاة ...
عنا بحكي عن مليون موضوع بقص ايدي اذا بعرف اكتر من اللي بعرفو اخوي الصغير عنهم و بخلص بعد ساعة الا ربع و احنا ملطوعين في الشمس منستنى حضرت جنابو تيخلص !
لا اله إلا الله !

الكيل بمكيالين 17.4.10  

وما بيكفينا بس المواضيع المملة والمعادة، اسمع اللغة العربية اللّي بيحكو فيها، ما شاءالله جهابذة!
المرفوع منصوب والمجرور محذوف، أنا بسمع الخطبة من شباك بيتي وبضحك.

Sh3rawi 17.4.10  

اه والله
انا ادني بتمزعوا تمزيع و انا بسمع بالبلاغة اللي بحكو فيها !

Whisper 20.4.10  

انا والحمد لله بروح عصلاه الجمعه من سنين و جربت اكتر من مسجد وفعلا زي ما حكيت للأسف معظمهم يا بكون واضح انه مش محضر للخطبه يا بتكون الخطبه اعطو اياها اخر لحظه
لحد ما الحمد لله بنو مسجد جديد والشيخ ماشاء الله عليه
مسجد ابو غزاله فعلا الله يجزيه الف خير هالشيخ :)

Sh3rawi 21.4.10  

هو ما اختلفنا في مساجد فعلا روعة,بس ظاهرة الخطب اللي لا تسمن ولا تغني من جوع منتشرة بشكل !
الله يخليلنا مسجد أبو غزالة (مع اني بعرفش وينو) و اللي زيو :)

عن حضرتي

أَنا حوارُ الحالمين ، عَزَفْتُ عن جَسَدي وعن نفسي لأُكْمِلَ رحلتي الأولى إلى المعنى ، فأَحْرَقَني وغاب

اللي بلحقوني

منعنعات

Qwaider Planet
Follow me on Watwet
Jordan Blogs

مدونات أتابعها

الازمة عندي