إطاعة عمياء

بعد شهر من الآن,سأكون أمام المرآة,أنظر إلى لحيتي غير المهذبة,غير المشذبة,و أنظف أسناني بالمسواك...
سأشتري دشداشة من ماركة الحلوة,و سيكون مسواكي معطّر, و سأشتري مسكا من عبدالصمد القرشي...
سيكون مِعوَلي في حقيبتي,و فأس صغيرة في جيبي...
سأكون قد اشتريت تذكرة روحة بلا رجعة لجدّة,لأني سأذهب منها إلى مكة, و اتعبّد ربي قليلا,ثم أبدأ عملي...

سأتصل مع CAT و سآشتق من عقولهم عرضا مغريا لاستئجار جرافات,و سأتواصل مع شركة بن لادن للتنظيف حتى ينظفوا المكان بعد ما أنهي عملي فيه ...

سوف نُخلي المسجد الحرام,تمهيدا لهدمه... شو بتحكي قاعد ؟ نعم:سوف نهدم المسجد الحرام ...
لا تخافوا:لن نهدم الكعبة,فقط المسجد الحرام...!

و لن يرجف لي جفن طول العملية,بل على العكس سأكون سعيدا,فانا أنفذ فتوى شرعية,لهدم المسجد الحرام,لان اختلاط النساء والرجال فيه عند الطواف هو اختلاط "محرم",و لذلك يجب هدمه و إعادة بنائه وفقا لتصميمات تراعي عدم الاختلاط بين النساء والرجال عند الطواف...
لكن عندي ملاحظة: و أنا بجهز حالي للعملية,خطر في بالي سؤال - و استغفر الله من هكذا سؤال - فقد أكد هذا السؤال على  أن إيماني ضعيف: هل كل العمرات والحجات الّتي قام بها الناس غير مقبولة بسبب الاختلاط ؟
بتحب تجاوبني يا يوسف الاحمد ؟ 
هدا يلي كان ناقصنا ! انا شكلي رح اموت بدبحة صدرية من ورا هيك ناس!

عصر "السرعة" و "التطور" !

سلامو عليكو,
اليوم و انا مروح عالبيت من مشوار شفت هاي الصورة , و حبيت أحطها !

 .
ترى ديرو بالكو ,مات 676 بني آدم في الـ99..
و علشاننا احنا عنا تفوق جيني,و أمانة عمان بتحب "تعصر" أدمغتنا,فالشعب الأردني ممكن يحسب عددهم في 2010, عن طريق معادلة التضخم ,لكنهم نسيوا يعطونا النسبة علشان نحسبوا!
أما عالم متطورين !

هل لديك رخصة سواقة شرف ؟

في كتير أشياء متفق عليها عالميا,و منها بعض الرخص,يعني مثلا في رخصة لقيادة الكمبيوتر,و في رخصة قيادة سيارة و في رخصة مزاولة مهنة...
في عنا في العالم العربي نوع آخر من الرخص,ألا وهو رخصة "سواقة" الشرف..
في الأردن يوجد لغط كبير حول هدي الرخصة,, وعلى أساس انه في اشي قانوني بدعمها,بالمادة 340 من قانون العقوبات الأردني,و منعا للُّبس و نشرا للفائدة هي نص المادة:

المادة 340 : العذر في القتل:
1- يستفيد من العذر المحل، من فاجأ زوجته أو إحدى محارمه حال التلبس بالزنا مع شخص آخر وأقدم على قتلهما أو جرحهما أو إيذائهما كليهما أو إحداهما.
2- يستفيد مرتكب القتل أو الجرح أو الإيذاء من العذر المخفف إذا فاجأ زوجه أو إحدى اصوله أو فروعه أو أخواته مع آخر على فراش غير مشروع.
أتوقع انو في ناس منا بضلو يحكو على هاي المادة من دون ما يعرفوا شو هيي, يعني لما تقرأها بتكتشف انه مش زي ما احنا متوقعين(خلينا نكون موضوعيين و انا بصراحة تفاجأت لما قرأتها من اللي قراتو و من اللي كنت مفكروا عنها)..
من قراءة المادة انا فهمت شغلتين:
أول شغلة,انه الشب يلي بخطط لقتل اخته مثلا و بالتعاون مع ولاد عمامو بستدرجوا اخته لمكان ما و بعدين بقتلوها باسم الشرف,فهدول "قانونيا" مجرمين,لانه هاي جريمة مع سبق إصرار و ترصد, و أكتر من مرة (همه اصلا كلهم اكم مرة يلي عرفنا فيهم عن هيك جرائم) انه المحكمة ما اعطت العذر المخفف لانها جريمة مع سبق إصرار و ترصد...
تاني شغلة,انه يلي بكون متزمت و اذا اخته تأخرت شويتين,أو اجته بنص الليل مثلا,بروح ابصر شو عامل في البنت عمايل برضو ما "بستفيد" من هاي المادة,لانه مافيها لا زنا و لا فراش أصلا...
يعني بتكتشفوا,انه المفروض ولا واحد قتل باسم الشرف حدا من خواته أو..أو,انه يستفيد من هاي المادة,لانه ولا واحد فيهم(على القليلة اللي قرأتهم) مسك اخته عم تزني او في فراش غير مشروع مع واحد...

الطرف الثاني في معادلة هاي الجرائم,هو قبول بل وتهليل المجتمع لهذه التصرفات, لانها تصرفات تنم عن سيطرة الذكورية المطلقة اللي الها كامل الحرية تعمل اللي بدها اياه في العالم و مش مشكلة..الشب يلي بعمل زي هيك بتحول لبطل عائلي لانه "لمّع" شرف العيلة المزيف أصلا,لانه الناس يلي بتفاخروا بهيك اشي ما عندهم شرف أصلا تيتلمع..
وأنا عم أبحث عن هاي المادة,قرأت انه هاي المادة تنطبق على الذكور دون الإناث...
يعني زملائي,لو وحدة - فرضا  ولا سمح الله و بعيد الشر - شافت جوزها - اللي اكيد مش جوزها لانه جوزها مخلص و وفي 100%  و رح ينقذ العالم من الشر,هي ملخبطة -  عم "بزني" أو على "فراش غير مشروع" ما بصحلها تعمل اشي...
طيب فرضا, وحدة شافت جوزها  و مسكته, و عملت في شغلة او طخته و شوهته,شو حيكون الرأي العام و الموقف الرسمي من القضية ؟ 

ملاحظات: 

1) مش شرط يكون في جريمة شرف علشان نتذكر نحكي في هاي القضية... 
2) انا كل حكيي كان من جهة قانونية,لانه موقف الأديان معروف...

ملاحظة برتقالية..!

السلام عليكم جميعا,


في الآونة الأخيرة انا صرت ملاحظ الحملة الدعائية لأورانج,وأتوقع في ناس كتير زيي عم يتساءلوا شو دخل أوارنج بالخطبة و الجاهة و كل السلافة الطرمة هاي....
"انا فخور بجدي الذي سيتقدم جاهتي","انا منشكح لانو صحابي رضيوا يتفضلوا على حفلتي","انا فرحانة لانو صاحباتي جايين على عرسي", و أكم جملة على هالمنوال...
و الأحلى,شعار أورانج: "معا لنحقق المزيد"...
انو مزيد اللي بحكي عنو ؟
مش بس يحسنوا خدماتهم اللي بتجنن؟مس بس يحققوا المزيد لحالهم؟ لما ينظموا حالهم زي الناس و الاوادم و يكونو شركة فرنسية بحق و حقيق مش طعة و قايمة!
قال شو,لنحقق المزيد,افهم من هالحكي انو أورانج مساهم فعال في تنمية المجتمع الأردني و كل يوم والتاني بتلاقيها طالعة بشغلة أو بعملة لخدمة الناس ؟ و دايما بتطلع مبادرات لتشغيل الشباب الأردني و تلبية طموحاته؟
طبعا أكيد همه عاملين الدعاية كلها علشان خدمات "الجيل الثالث" تاعت الحكي بالفيديو,بس كيف يعني جدي بدو يتقدم الجاهة من التلفون ؟ أو صحابي بحضروا الحفلة "لايف" بس من بعيد عن طريق خدمة أورانج للجيل الثالث ؟ واو!
انا فكرت فيها, و طلع معي هادا الاحتمال النغش:يعني توقعوا يجيكو كرت عرس كالتالي :
                           هذا العرس برعاية أورانج 
   أبو محجوب و قبيلة المحاجيب             أبو محمد و العائلة الكريمة
                          يدعونكم لحضور حفل زفاف
        ابنه                       و                     كريمته
     محجوب                                            فاطمة
   و ذلك في صالة الأفراح العامرة دائما ان شاء الله
   و أدام الله الأفراح حليفة لنا لا عدوا علينا


ملاحظات:
1) ممنوع اصطحاب الأطفال أقل من 18 سنة...
2) الرجاء عدم الحضور قبل التاسعة مساء,يعني استحوا على حالكو,فش حدا يستقبلكو!
                          أورانج...معا لنحقق المزيد !
وعالعافية!

عن حضرتي

أَنا حوارُ الحالمين ، عَزَفْتُ عن جَسَدي وعن نفسي لأُكْمِلَ رحلتي الأولى إلى المعنى ، فأَحْرَقَني وغاب

اللي بلحقوني

منعنعات

Qwaider Planet
Follow me on Watwet
Jordan Blogs

مدونات أتابعها

الازمة عندي