ملِّق واربح!

التمليق كلمة جدا رائعة,و انا بحيي اللي اخترعها من كل قلبي,لانها كلمة تختزل معاني كتيرة في كلمة واحدة,ملُّقت يعني خلص قرف و ملل و فش اشي تساوي و كابسة معك و واصلة  لراس مناخيرك! وللي ما بعرفها او ما بعرف كيف بتنقرأ,فالـ"ق" بتنقرأ باللهجة الأردنية زي هيك يعني "mallagat" ... للأسف صرنا نستخدم الانجليزي علشان نشرح كيف بتنقرأ الكلمات ! هي وقفت على هاي!


 متل ما انا ملاحظ هالايام,الشعب الاردني كاملا - الا من رحم ربي - عنده حالة تمليق مش طبيعية,في كل الاوقات و كل الاماكن تقريبا..
كله قرفان عيشته و زهقان شغله و دايما معصب,طبعا هادا كله مش من فراغ جاي,هادا جاي بسبب السياسيات الحكومية الرشيدة في التخفيف عن كاهل المواطن قدر الإمكان و رفع مستوى المعيشة و الرفاهية في حياته,فالشب اللي عنده مشاكل اقتصادية و حرمان عاطفي و معوش مصاري يساوي اشي ولا يتجوز اشي طبيعي انو يملق.حتى العيشة نفسها بالنسبة لبعض الناس ترف ما عرفوه لسا...الله يكون بعون الجميع و يفرجها علينا جميعا...


الاشي المش حلو في التمليق انو مش شرط تكون عندك هاي الشروط حتى تملّق,يعني البيئة الها تأثير,فمثلا اذا انت دايما حوالين ناس دايما عندها تمليق,فإشي طبيعي انو هاي الحالة تنتقل إلك و دواليك,برضو شغلة تانية انو التمليق ما بيتورث,يعني لهلأ ما سمعت بجين التمليق,يعني لو عشت بعيد عن أهلك اذا عندهم تمليق اكيد  ما رح "تملق معك" و حتعيش طبيعي..بس ماحدا بعرف بلكي تسير طفرة عنا في الأردن في بعض ناس و يتحول التمليق بقدرة قادر إلى جينات و يصير يتورث!


التمليق في المدارس اشي كتير خطير, و خصوصي اذا كنت طالب توجيهي و بالأخص في الفصل التاني,فهدا اشي جد مقرف,شعور التمليق,حتى لو بدكش,فتلات ارباع الصف مملقة معو,و تلقائيا حتملق معهم كلهم,و تصيبك حالة مقلقة من الاحباط و الصدمة النفسية .. و خصوصي انو الأغلب بكون بايعها على الفصل التاني, والاساتذه التانيين كابسة معهم,و فش حدا طايق التاني و مش مصدق تيخلصوا هالشهرين على خير..فا الله يعين طلاب التوجيهي,و بخلصوا على خير هالسنة و كل سنة ...


تملقوا على خير!
و عالعافية

4 التعليقات:

Whisper 26.2.10  

مع اني متابعه لكل المصطلحات بس هاي جديده :$

موضوع ان اي شعور سلبي ممكن ينتقل من اللي حواليك الك كتير صح , انا جربته و جربت بس ابعد عن هالبيئه السلبية كيف بكون كتير احسن

شكرا عالمصطلح الجديد, بس يجي اخوي بدي احكيله اياه :)

حمزة الشعراوي 27.2.10  

اهلا و سهلا,الله يبعدنا عن "البيئة السلبية"
شرفتي المدونة :D

لبنــــــــــى 27.2.10  

كنت بعرف انو متملق يعني بمسح جوخ هاي على ايامنا زمان
لكن تمليق الجديدة هاي
حلوة
اللي اخترعها واحد متملق :)

حمزة الشعراوي 27.2.10  

اول اشي اهلا و سهلا فيك في المدونة..
هلا في اشي اسمو تمليق (اللي هو عم احكي عنو) و هداك تملّق تاع مسح الجوخ و هز الدنب .. مش زي بعض الكلمتين

عن حضرتي

أَنا حوارُ الحالمين ، عَزَفْتُ عن جَسَدي وعن نفسي لأُكْمِلَ رحلتي الأولى إلى المعنى ، فأَحْرَقَني وغاب

اللي بلحقوني

منعنعات

Qwaider Planet
Follow me on Watwet
Jordan Blogs

مدونات أتابعها

الازمة عندي